प्रतिनिधी – सचिन दिनकर
पाथर्डीत सध्या पालिका निवडणुकीची लगबग सुरू आहे. त्याच वेळी लोकनेते गोपीनाथ मुंडे यांच्या पूर्णाकृती पुतळ्याचे रात्री उशिरा झालेले अनावरण हे शहरात आणि राजकीय वर्तुळात चर्चेचे मुख्य कारण ठरले आहे. रविवारी मध्यरात्रीनंतर सुमारे 12 फूट उंचीचा पुतळा शहरात दाखल झाला.
आमदार मोनिका राजळे यांनी निवडक कार्यकर्त्यांसह पुतळ्याचे स्वागत करून मिरवणुकीस सुरुवात केली. फटाक्यांची आतषबाजी, घोषणाबाजी आणि फुलांची उधळण करत कार्यकर्त्यांनी नेत्यांप्रती निष्ठा व्यक्त केली. जॉगिंग पार्कपर्यंत नेण्यात आलेल्या या मिरवणुकीत उत्साह ओसंडून वाहत होता.
सुमारे आठ वर्षांपूर्वी शेवगाव रोडवरील भूखंडावर जॉगिंग पार्क उभारण्याचा निर्णय घेण्यात आला होता. त्याच वेळी स्व. आमदार राजीव राजळे यांच्या सूचनेनुसार लोकनेते गोपीनाथ मुंडे यांचा पुतळा त्या ठिकाणी बसविण्याचा निर्णय झाला होता. मात्र भाजपमधील काही कार्यकर्त्यांनी त्या वेळी या ठिकाणाबाबत नाराजी व्यक्त केली होती आणि जागा बदलण्याची मागणी केली होती. तरीही पालिकेने नियोजित जागेवरच बांधकाम पूर्ण केले.
पुतळा उभारणीचा कार्यक्रम दिवसाढवळ्या आणि कार्यकर्त्यांच्या उपस्थितीत करण्याचा आराखडा आधी ठरला होता, मात्र शेवटच्या क्षणी मध्यरात्री पुतळा बसविण्याचा निर्णय घेतल्याने भाजप कार्यकर्त्यांमध्ये संभ्रम निर्माण झाला आहे. काहींनी यामागे राजकीय हेतू असल्याचा संशय व्यक्त केला आहे. शहरातील काही भाजप नेत्यांनी सांगितले की, जर हा कार्यक्रम भावनिक वातावरण निर्माण करण्यासाठी आखला असेल, तर त्याचा हवाला निवडणुकीत फारसा उपयुक्त ठरणार नाही.
कार्यकर्त्यांपैकी एका व्यक्तीने पुतळा उभा केल्यानंतर तत्काळ पंकजा मुंडे यांना व्हिडिओ कॉल करून कार्यक्रम दाखवला. पंकजा मुंडे यांनी त्या वेळी कार्यकर्त्यांचे अभिनंदन करत शुभेच्छा दिल्या, पण त्यांनी पुढे सांगितले की त्यांना घाई असल्याने नंतर प्रत्यक्ष पुतळा पाहण्यासाठी येतील. या संवादादरम्यान त्यांच्या चेहऱ्यावरील हावभावांबाबत मात्र कार्यकर्त्यांनी मौन पाळले.
पालिका निवडणुकीच्या पार्श्वभूमीवर झालेल्या या अनावरणामुळे भाजपमधील अंतर्गत मतभेद पुन्हा एकदा उफाळून आले आहेत. या घटनाक्रमामुळे स्थानिक राजकारणातील समीकरणे कशी बदलतात, याकडे आता सर्वांचे लक्ष लागले आहे.
