प्रतिनिधी – सचिन दिनकर
पाथर्डी – तालुक्यातील करोडी गावातील प्राचीन शनिमारुती अर्थात काळा मारुती मंदिरात चोरट्यांनी हात साफ करत भाविकांच्या श्रद्धेवरच डल्ला मारला आहे.
लोखंडी दानपेटी फोडून त्यातील अंदाजे साडेतीन लाख रुपयांची रोकड चोरट्यांनी लंपास केल्याची घटना उघडकीस आली असून, संपूर्ण परिसरात खळबळ उडाली आहे.पुजारी शिवाजी ज्ञानदेव दहिफळे यांनी दिलेल्या माहितीनुसार, शनिवारी सायंकाळी नियमित पूजेनंतर दानपेटी सुस्थितीत होती. मात्र रविवारी सकाळी दर्शनासाठी आलेल्या नवनाथ बेळगे आणि म्हतारदेव गोल्हार यांच्या नजरेस दानपेटी फोडलेली दिसताच त्यांनी तत्काळ पुजारींना खबर दिली. दहिफळे मंदिरात पोहोचले असता दानपेटी उघडून रोकड चोरीस गेल्याचे स्पष्ट झाले.
घटनेची माहिती समजताच ग्रामस्थ आणि राजेंद्र खेडकर तत्काळ मंदिरात जमले. विशेष म्हणजे, ही दानपेटी मागील तीन वर्षांपासून उघडण्यात आलेली नव्हती. त्यामुळे त्यात तीन ते साडेतीन लाख रुपयांची रक्कम जमा झाल्याचा अंदाज व्यक्त केला जात आहे.दरम्यान, पाथर्डी पोलिसांनी घटनास्थळी धाव घेऊन पंचनामा केला असून, अज्ञात चोरट्यांविरुद्ध गुन्हा दाखल करण्यात आला आहे. चोरीचा तपास करण्यासाठी पोलिसांनी विशेष पथक तयार केले असून, चोरट्यांचा शोध सुरू आहे.भाविकांमध्ये संताप आणि दु:खाची भावना व्यक्त होत असून, या घटनेने श्रद्धास्थळाच्या सुरक्षेचा मुद्दा पुन्हा ऐरणीवर आला आहे.
