🌳 पाथर्डीत वृक्षांचा वाढदिवस केक कापून व भजनांच्या गजरात साजरा 🌳

पाथर्डी : “वृक्षवल्ली आम्हा सोयरे वनचरे…” या संत तुकाराम महाराजांच्या अमूल्य वचनांचा प्रत्यक्ष प्रत्यय आणून देणारा आगळावेगळा उपक्रम पाथर्डीत अनुभवायला मिळाला. श्री विठ्ठल-रुक्मिणी व संत सेना महाराज मंदिर प्रांगणातील वटवृक्ष आणि पिंपळाच्या वाढदिवसाचा सोहळा मोठ्या भक्तिभावात पार पडला. पाच वर्षांपूर्वी स्व. ज्ञानदेव माऊली मर्दाने यांच्या स्मृतिप्रीत्यर्थ वृक्षमित्र डॉ. दीपक देशमुख व सुखदेव मर्दाने यांच्या हस्ते लावण्यात आलेल्या या वृक्षांना यावेळी हार घालून, केक कापून आणि सुमधुर भजनांनी अभिषेक करण्यात आला.

या अनोख्या उपक्रमासाठी नगरसेवक बंडू पाटील बोरुडे, सामाजिक कार्यकर्ते हुमायून आतार, वृक्षमित्र डॉ. दीपक देशमुख, पत्रकार शन्नो पठाण यांसह अनेक मान्यवर उपस्थित होते. मान्यवरांच्या हस्ते सुखदेव मर्दाने यांचा सत्कार करून उपक्रमाचे कौतुक करण्यात आले.

यावेळी बोलताना बंडू पाटील बोरुडे म्हणाले, “मर्दाने परिवारासारखे उपक्रम सर्वत्र राबले, तर पाथर्डी हिरवाईने नटलेली दिसेल.” डॉ. दीपक देशमुख यांनी वृक्षसंवर्धनाच्या महत्त्वावर भाष्य करताना सांगितले की, “लागवड जितकी महत्त्वाची तितकीच संवर्धनाची जबाबदारीही आवश्यक आहे. पर्यावरणाचा समतोल राखण्यासाठी हीच खरी काळाची हाक आहे.” तर हाजी हुमायून आतार यांनी नमूद केले की, “माणसाने निसर्गालाही आपल्या कुटुंबाचा घटक मानून जगले पाहिजे, जेणेकरून पुढील पिढ्यांना हिरवाईचा वारसा मिळेल.”

सोहळ्याला महिला भजनी मंडळाने भक्तिमय गवळणी, अभंग व भजने सादर करून वातावरण अधिक पवित्र केले. सुनिता दहिफळे, सुषमा काटे, पुष्पा शिरसाठ, सुवर्णा कुऱ्हे यांच्यासह अनेक महिलांनी आपल्या स्वरांनी कार्यक्रमात उत्साह निर्माण केला.

कार्यक्रमाचे प्रास्ताविक व सूत्रसंचालन सनी मर्दाने यांनी केले. पाथर्डीतील हा उपक्रम केवळ वेगळा नाही तर पर्यावरणपूरक विचारांचा दीपही ठरला.