प्रतिनिधी – सचिन दिनकर
पाथर्डी – दिवाळी सणाच्या पार्श्वभूमीवर बाजारपेठा, मुख्य रस्ते आणि गल्लीबोळ गर्दीने फुलून गेले आहेत. खरेदीचा हंगाम आणि सुट्ट्यांमुळे वाहतुकीचा ताण प्रचंड वाढला आहे.
या पार्श्वभूमीवर सर्वसामान्य नागरिकांची सुरक्षितता अबाधित राहावी आणि सणाच्या उत्साहात कोणत्याही प्रकारचा अनुशासनभंग होऊ नये, यासाठी पाथर्डी पोलिसांनी शहरात धडक मोहीम हाती घेतली आहे.
या कारवाईत दारू पिऊन वाहन चालवणारे, कर्कश हॉर्न वाजवणारे, बेशिस्त व वेगाने वाहन चालवणारे, ‘सिनेस्टाईल’ वाहन चालवून इतरांच्या जीवाला धोका निर्माण करणारे तरुण, तसेच गर्दीचा फायदा घेऊन भुरट्या चोऱ्या करणाऱ्यांवर पोलिसांनी विशेष लक्ष केंद्रीत केले आहे. शहरातील मुख्य चौक, बसस्थानक परिसर, बाजारपेठ आणि प्रवेशद्वारांवर पोलिसांचा कडक बंदोबस्त ठेवण्यात आला आहे.
दरम्यान, काल सायंकाळीच पोलिसांनी विविध नियमभंग करणाऱ्या सुमारे १२ जणांवर प्रतिबंधात्मक कारवाई केली आहे. या कठोर हालचालीमुळे नागरिकांना मोठा दिलासा मिळाला असून अनुशासनभंग करणाऱ्या आणि मद्यपान करून गोंधळ घालणाऱ्या घटकांमध्ये चांगलीच दहशत निर्माण झाली आहे.
पोलीस उपनिरीक्षक विलास जाधव यांनी सांगितले की, “सणाच्या दिवसांत नागरिकांनी संयम पाळावा. दारू पिऊन वाहन चालवणे, विना नंबर प्लेट वाहने चालवणे, दुचाकीवर तीनपेक्षा जास्त प्रवासी बसवणे किंवा अनावश्यक हॉर्न वाजवणे यांसारख्या गोष्टी टाळाव्यात. पोलिसांची ही कारवाई केवळ दंडासाठी नसून, अपघातमुक्त आणि सुरक्षित दिवाळी साजरी करण्यासाठी आहे.”
या मोहिमेत पोलीस निरीक्षक विलास पुजारी यांच्या मार्गदर्शनाखाली पोलीस उपनिरीक्षक विलास जाधव, निवृत्ती आगरकर, तसेच पोलीस कर्मचारी अमोल आव्हाड, निलेश गुंड, मधुकर कोकाटे, अल्ताफ शेख, विजय काळोखे, शिवाजी नागरे यांनी सक्रिय सहभाग घेतला.
पाथर्डी पोलिसांचे हे पाऊल सणासुदीच्या काळात नागरिकांच्या सुरक्षिततेचा धागा अधिक मजबूत करणारे ठरले असून, शहरात कायद्याचा धाक आणि नागरिकांमध्ये विश्वास दोन्ही निर्माण झाले आहेत.
